【解開潤唇膏起砂疑團】

睇咗一篇研究點整朱咕力嘅journal,發現應該可以解答潤唇膏有砂嘅問題。其實我整咁多次潤唇膏都未試過有砂,如果你有咁嘅情況試吓用以下方法會唔會有改善。
油脂類材料凝固時會形成結晶,如結晶多而細,質地就會滑,結晶粗大就會嚡,如果你支潤唇膏有砂,嗰啲就應該係勁大粒嘅結晶,以下係可能原因:
1. 油內雜質成為結晶體種子,令晶體越結越大粒。所以用靚油應該會少啲砂。
2. 冷卻時室溫太低。
3. 冷卻時間過長。哩個可能因為你加熱得溫度太高,放好長時間先凝固,時間越長結晶會越大粒。
4. 攪拌速度太慢。攪拌可以防止結晶變大。
另外,以下做法可能減低結晶情況:
1. 混合幾種油脂。
2. 由於蜜蠟同油嘅溶點差距較大,加入一啲兩者中間嘅脂類材料會有幫助,如乳木果脂、可可脂、植物凡士林。
3. 加入葵花籽油可防止結晶。
如果大家有跟過我啲配方整唇膏,會發覺我次次都係混合幾種油、脂,同埋會落葵花籽油/ 浸泡油(都係葵花籽油底),我揀佢係因為覺得佢做出嚟特別滑,原來真係有research證明佢有特別作用。

Share Button